MPANGO SHIRIKISHI WAKUTOKOMEZA UKATILI KIJIJI CHA SAYU HALMASHAURI YA WILAYA SHINYANGA WAANZA RASMI

Na Kareny Masasy, Shinyanga

MPANGO  shirikishi na endelevu wa utoaji wa elimu ya afya ya jamii na kutokomeza ukatili wa kijinsia kwa wanawake na watoto  umeendelea kuondoa changamoto zilizokuwepo   na zinazoibuka  kwenye jamii  katika Kjiji cha Sayu Kata ya Pandagichiza wilayani  Shinyanga.

 Hayo yamesemwa  na Kaimu Mtendaji wa kata  ya Pandagichiza   ambaye ni mtendaji wa kijiji cha Sayu  Rwambo Mayanzani  alipokuwa mgeni rasmi kwenye uzinduzi wa  mpango  shirikishi  wenye mambo manne  ulioanzishwa na mwananchi wa kijiji  hicho  Shadrack   Dasea baada ya kupata kibali kutoka serikalini.

Mayanzani  amesema wameungana na mwananchi huyo  kwani  kitu alichokianza  na mawazo  yake  ni mazuri ambapo wamekuwa wakitoa  elimu ya afya kwa jamii na kutokomeza  vitendo vya ukatili  kwa kupita kwenye nyumba za ibada,shuleni na sokoni.

“Elimu ya ukatili  imeendelea kutolewa  kwa watu wote baada ya kuona  wahanga  zaidi walikuwa wanawake na watoto  lakini   ukatili umeenda ukipungua   wanaume nao kuelimika  ndani ya familia zao”amesema Mayanzani.

 

 Mwanzilishi wa mpango huo  ndani ya kijiji  Shadrack Dasea  ameamua kuanzisha mpango  huo baada ya kuguswa kwa  kuongezeka kwa matukio ya ukatili ndani ya jamii huku  akiamini kuwa akitoa  elimu hiyo itasaidia kuboresha ustawi wa wananchi.

 Baadhi ya wananchi wa kijiji hicho  Verena Mihambo  na Laurent  Kongoshi  waliohudhuria  uzinduzi wa   mpango  huo wameeleza kuja  kwa wakati  sababu  viashiria vyote  vya masuala ya ukatili   kwa wanawake na watoto wanaendelea kuvitokomeza kwa ushirikiano.

 Ofisa Maendeleo ya Jamii  mkoa wa Shinyanga  Bestina Gunje alieleza Mpango Mkakati wa Mkoa na  Mpango  Mkakati wa Taifa  wa kutokomeza ukatili  kwa Wanawake na Watoto ( Mtakuwwa)  umefanikiwa kupunguza  tatizo la ndoa za utotoni kutoka asilimia 35 hadi asilimia 21.

“Mpango Mkakati wa Taifa  ulioanza mwaka  2023 nakuisha mwaka 2024 na hapa Shinyanga  mpango wetu  uliopo umeendana  na mazingira ya mkoa yalivyo ambao ulianza  mwaka 2021  nakuisha mwaka 2025  tulikuwa na changamoto ya  ndoa za utotoni  asilimia 35  na sasa  tumeshuka nakufikia asilimia 21 hayo ni mafanikio makubwa kwetu”alisema .

Mwenyekiti wa Umoja wa mashirika yasiyo ya kiserikali mkoani Shinyanga yanayopambana na Ukatili dhidi ya Wanawake na Watoto (SHY-EVAWC Working Group) Jonathan Manyama  aliyeshiriki kwenye uzinduzi huo alisema  vitendo vyote vya ukatili wa kijinsia vinapaswa kupingwa na watu wote na kuacha tabia ya kuendeleza vitendo vya  ukatili.