JESHI LA POLISI LAWASHIKILIA WATU 75 KWA MADAI YA KUSHAMBULIA WATUMISHI NA KUCHANA NYARAKA

 

 Na Kareny  Masasy, Kishapu

WATU  75 wanashikiliwa na Jeshi la Polisi Mkoani Shinyanga kwa tuhuma ya kuhusika katika matukio mawili likiwemo la kuwashambulia watumishi wa serikali na kuchana nyaraka za serikali wakati wakiwa katika majukumu yao.

 Kamanda wa jeshi la polisi mkoa Janeth Magomi amesema hayo huku akieleza  sababu ya kushikiliwa watu hao ni kuwavamia na kuwashambulia  watumishi watatu wa Kata ya Idukilo wakiwa kwenye majukumu yao kijiji cha Sanjo.

Kamanda Magomi amewataja   walioshambuliwa ni  Mtendaji wa Kata ya Idukilo Masembe Msele(50)Afisa maendeleo ya Jamii Kata ya Mwaduiluhumbo Rose Shao(38) walivamiwa  na kupigwa.

Wengine ni Mwenyekiti wa Kijiji cha Sanjo na kaimu mtendaji wa kijiji na wajumbe watatu wa serikali ya kijiji wakiwa kwenye zoezi la kuingiza kaya masikini kwenye mpango wa TASAF ambapo  walivamiwa na watu waliokuwa na pikipiki mbili na kuanza kuwapiga.

Kamanda Magomi amesema  watu hao walianza kuwapiga kisha kuchana nyaraka ambazo walikuwa wameingiza baadhi ya majina kwenye mpango wa kaya masikini huku wakidai hawataki kuona kiongozi yeyote wa serikali anafanya kazi ndani ya kata hiyo.

Kamanda Magomi amesema  kufuatia tukio hilo Jeshi la polisi mkoa wa Shinyanga lilianza upelelezi na kuwakamata watuhumiwa waliohusika na tukio hilo ambapo tukio jingine lilitokea Juni moja,2026 majira ya saa sita na nusu usiku katika Kijiji cha Idukilo baadhi ya wanakijiji walipigwa.

Magomi amesema  tukio hilo wanakijiji hao wanadaiwa kupigwa kwa madai ya kuwa wao ndiyo wanatoa siri kwa Jeshi la polisi na Mkuu wa Wilaya kwa kupeleka majina ya wanaofanya fujo ambapo vurugu hizo zilisababisha uharibifu ikiwemo kuvunja baadhi ya maduka ya wafanyabiashara.