DARAJA IKINDA-BUGARAMA LAONDOA KERO KWA WANANCHI

Na Kareny Masasy, Msalala

WAKAZI  wa  kata ya Ikinda na Bugarama Halmashauri ya Msalala Wilayani Kahama mkoani Shinyanga wameondolewa kero ya kushindwa kupitia kwenye eneo la barabara ya  Ikinda kwenda Bugarama ikihitaji ujenzi wa daraja kuvuka wakati wa mvua. 

Wananchi hao  Vicent Lukuya na Farida Magembe wamesema hayo leo  kwa nyakati tofauti  baada ya kiongozi wa Mbio za Mwenge  wa Uhuru Kitaifa Wazo Mwang'onda kuzindua daraja hilo ambalo  amewashauri kulitunza miundombinu yake.

"Mradi huu nimeufungua kwani changamoto zilizokuwa zikiwakabili zimeondoka  hakuna budi kuendelea kuwa watulivu na kuendelea  kuitunza amani ya nchi kwani amani ikikosekana na daraja likawepo ni kazi bure"amesema Mwang'onda.

Meneja wa Wakala wa Barabara mjini na Vijijini (Tarura) wilaya ya Kahama  Mhandisi Joseph Mkwizu akitoa taarifa kwa kiongozi wa mbio za Mwenge amesema  mradi wa ujenzi daraja hilo ulianza rasmi  mwaka 2025 mwezi Septemba na kukamilika mwezi Julai mwaka 2026.

Mhandis Mkwizu amesema  daraja hilo lina urefu mita kumi na moja,upana mita nane  ambapo  ujenzi wa wake umekwenda sanjari na kuweka makaravati matatu ,kunyanyua tuta na kuweka molamu urefu wa kilomita moja na kuchonga barabara kilomita moja.

"Gharama ya mradi  wote ni shilingi Milioni 410 na kukosekana kwa daraja kulisababisha wananchi kushindwa kuvuka na kusafirisha mazao yao na shughuli zingine za kibiashara na kijamii"amesema Mhandis Mkwizu.